做咗醫院管理局主席九年嘅胡定旭（肥胡）今年十一月就任期屆滿，大家都好關注政府會搵咩嘢人接棒。肥胡日前就疑似透露玄機，話說佢前晚出席公共醫療醫生協會及政府醫生協會嘅周年晚宴，一如既往攞住酒杯滿場飛。
期間肥胡突然拉埋同場嘅醫學會副會長、眼科名醫周伯展走向在場記者，仲叫大家唔好問點解，總之同周醫生飲杯先，然後爆出耐人尋味一句：「十日內，如果你哋無嘢要恭喜周醫生，我飲番十倍！」周醫生一味笑而不語，話唔知有咩嘢好恭喜喎。
周醫生被視為忠實「梁粉」，仲有指佢係特首梁振英嘅醫療智囊，仲一度傳過佢係醫管局主席人選之一，肥胡此時拋出呢番言論自然惹人聯想。
不過亦有在場人士估計，十日之內最特別嘅日子當然就係七月一日，政府會喺前一日公布授勳名單，肥胡可能係暗示周醫生會獲授勳啫。
講番個晚會，一眾醫療界猛人應約赴會，除咗食物及衞生局局長高永文同副局長陳肇始，仲有行政會議成員李國章、港大校務委員會主席梁智鴻、港大醫學院候任院長梁卓偉、醫學會兩任會長謝鴻興同蔡堅、醫學界議員梁家騮等，真係冠蓋雲集。