政情：李漢奸 鐵頭仁鬼打鬼
美國中情局前特工斯諾登留喺香港短短幾個星期，便已掀起滿城風雨。過程中一語不發嘅泛民主派人士喺斯諾登離港後，輪流發言。先有白鴿黨嘅前主席何俊仁（鐵頭仁）自爆係斯諾登嘅法律代表，又話中央政府派出中間人勸斯諾登離港。之後有外號「李漢奸」嘅白鴿黨創黨主席李柱銘，以及「民主阿婆」前政務司司長陳方安生評論事件。尋日，李漢奸再上電台節目，話港府行「師爺橋」，唔放人畀美國唔啱。其實鐵頭仁幫斯諾登離港，李漢奸就話放佢走唔啱，似乎呢對朋友暗地裏打對台喎。
李急護主 指港府出「師爺橋」
李漢奸尋日再上電台節目評論斯諾登事件時，被主持問到平時咁敢言嘅佢，係咪因為同美國政府關係好，所以喺事件上唔多敢言。李漢奸就話佢係喺法律觀點上睇呢件事，因為兩個國家簽咗引渡協議，人哋要攞人，港府冇理由唔交，所以港府做得唔啱；又話喺呢啲事上，港府做唔到決定，所以一定係北京話事，但係港府點都要先通過法律程序先決定係咪放人喎。
不過，係美國政府竊聽在先，係咪應予以譴責呢？李漢奸就話，美國政府竊聽係唔啱，但北京同英國都有啦。就算要美國政府交代，都冇理由放咗人仲要交代，話港府出呢啲叫「師爺橋」。李漢奸呢招好似鬧咗美國，但又拉埋中英兩國落水，好難怪人哋唔聯想佢同美國嘅關係喎。莫非佢真係決心要做到被人話漢奸，日日做漢奸？
跟住主持人又問，咁覺得斯諾登係英雄，抑或叛國者呢？李漢奸就支吾以對咁話，斯諾登揭露美國政府竊聽係正確，不過如果係佢嘅話，爆完料之後就唔會一走了之喇，因為作為一個吹哨者（Whistleblower），佢會喺自己國家吹哨，又或者喺外國吹哨後，返到自己嘅國家承擔一切責任喎。
原來李漢奸有啲咁嘅諗法，怪唔得佢成日去美國唱衰香港之後，返港被話漢奸都冇所謂啦。不過，就斯諾登事件，要同鐵頭仁打對台喎，咁都冇所謂？話晒白鴿代表和平，唔怕會傷彼此嘅感情咩？