中環出更：獲頒科大院士 陳有慶三代同歡
科技大學尋日頒授榮譽大學院士予亞洲金融集團及亞洲保險董事長陳有慶（Robin）及著名小提琴家西崎崇子等，以表揚佢哋對科大嘅傑出貢獻。Robin喜獲殊榮，陳家上下開心到極，兒子陳智思更一家四口總動員撐場，三代同堂好溫馨。
Robin擔任過七年科大校董會成員，至今仍係顧問委員會榮譽委員。睇唔出Robin同夫人陳沈時芬已經八十一歲，問佢哋有乜保養心得？陳太教路，日日保持心境開朗，飲食清淡啲，多食魚、豆腐、牛奶，健康自然有。
朱鄧麗萍賀西崎崇子
Robin夫婦結婚六十一年依然恩愛，陳太甜笑話，夫婦之間有爭執，老公會唔出聲，咁就冇交嗌喇。佢自己一嬲就會去畫畫，衣服、傢俬、絲巾都可以做畫布，仲試過繪畫領呔送畀老公添。
太子珠寶鐘錶主席鄧鉅明胞姊朱鄧麗萍都喺度，原來佢專程來賀西崎崇子。佢話多年前透過朋友介紹而互相認識，大讚對方毫無架子，經常相約去街。不過講到音樂，朱太坦言唔係咁識欣賞，但會介紹畀朋友聽。現為科大兼任教授嘅西崎崇子未言引退，會繼續培育下一代。
獲頒院士嘅仲有惠理集團主席兼聯席首席投資總監謝清海，以及微軟全球資深副總裁兼微軟亞太研發集團主席張亞勤。於馬來西亞出生，但扎根香港近四十年嘅謝清海，致詞時大爆去年已放棄當地戶籍，正式入籍香港，期望貢獻更多予社會。
卓妮