香港迪士尼樂園慣常會例行檢查入園旅客嘅隨身袋物品，但總括過去經驗，發現禁止帶入園嘅違禁品真係千奇百趣。話說有次職員喺一名旅客嘅隨身袋發現一支槍，仲要係真槍，原來係一名警員休班後急不及待同家人會合去迪士尼玩，連支槍都未放回家。迪士尼當然拒絕佢入園啦，而該名警員自知理虧，為免惹起麻煩，最後都乖乖無入園，唔知佢有冇趕返屋企放低支槍再去過呢？
原來唔單止休班警員心急入迪士尼，過往樂園亦發現有旅客攜帶全隻燒豬同一把刀入園，查問之下原來係有班旅客啱啱拜完山，趕往入樂園玩，於是就順理成章帶埋燒豬同把刀入園囉！另外，亦有旅客一次過帶咗二十幾罐汽水入樂園，又有人帶埋雙截棍入園，騎呢到真係估佢唔到。
講開又講，原來樂園同警方一直保持「密切」關係，警方每年都會有一晚喺樂園做反恐演習，有時樂園職員仲會充當臨記參與「演出」，真係好難想像平時充滿歡樂嘅樂園，可能因為反恐演習而出現示威、恐襲、警員施放催淚彈嘅混亂場面，好彩嗰刻啲迪士尼卡通人物已經返屋企休息，唔係實嚇親。