政情：有相為證：白鴿錯掛橫額 惡「仁」先告狀

唔知白鴿黨何俊仁（鐵頭仁）近期係咪忙於「代表」美國中情局前特工斯諾登，搞到連街上橫額都掛錯位，仲要惡人先告狀咁屈人哋玩針對。話說鐵頭仁喺荃灣掛咗張呼籲市民七一上街嘅橫額，但被新界社團聯會（新社聯）嘅反佔中橫額遮蓋，點知佢未查清楚就屈新社聯玩針對，仲向地政處投訴。不過，翻查地政處紀錄，有關橫額位置係編排畀新社聯嘅，而鐵頭仁尋日就急急搵人去拆除掛錯嘅橫額補鑊。最離譜係，該黨荃灣區議員李洪波仲卸膊，歸咎地政處嘅告示寫得唔清楚，所以搞到佢哋掛錯位，又賴新社聯唔通知佢掛錯橫額喎！