香港電訊主席李澤楷（小小超）日前接受美國《彭博商業周刊》訪問，就電訊公司發展、對香港前景看法等話題暢所欲言，表現比以前健談。
小小超以前例牌唔回應關於父親嘅問題，今次記者問佢「成為了一個父親，也幫你更理解你的父親了嗎？」佢態度明顯較溫和：「也有的，這個我們下次再聊吧」，睇嚟佢成為三子之父後寬容咗好多喎。
現年四十六歲嘅小小超，以往經常喺財經版出現，但自從年前佢同前女友梁洛施及三個兒子嘅故事曝光後，一下子成為咗娛樂版嘅風雲人物，似乎大家都對其家庭嘅興趣更大。
訪問中，小小超又話，做咗父親之後，最大改變係對「可持續性」嘅理解。佢話依家冇可能好似二十幾歲時每日工作十八小時，又套用到東南亞國家方面，話高速發展之餘亦要維持可持續發展。
當年港府計劃將數碼港發展成高科技中心，小小超獨家獲得大幅地皮發展貝沙灣，引起各大地產商強烈不滿，質疑港府明益小小超。
對此種質疑，小小超卻嗤之以鼻，否認數碼港係佢嘅計劃，澄清呢個係港府嘅計劃，佢只係幫政府出主意喎。