政情：立會大數亂花 細數孤寒
○九年立法會成立專責委員會調查梁展文事件，當時因為新世界發展相關人士未有出席會議應訊，雙方因而對簿公堂，雖然立法會已聘請律師處理，但議員梁國雄（長毛）竟然另聘律師，而立法會行政管理委員會（行管會）竟然同佢「癲」，決定貼二十幾萬元畀佢做律師費，而長毛益嘅就係身兼大律師嘅「李漢奸」李柱銘，納稅人啲公帑使得認真冤枉。
精品店蝕少少想止血
立法會使埋啲冤枉錢唔識節流，估唔到連開源都唔識。原來立法會間精品店開咁耐蝕足咁耐，至今蝕咗幾萬元，據講店內售賣印有立法會標誌嘅產品，但銷情一直麻麻，行管會就討論點幫精品店止血，以免繼續蝕落去。有委員覺得現時貨品定價太低，好難有錢賺，建議唔好統一貨品嘅毛利率，應該係邊樣貨品去貨快就賣貴啲，咁先係做生意之道喎。
亦有委員認為，精品店開放時間係朝九晚六，但邊有人晨咁早買紀念品呢？所以建議推遲開舖時間，寧願做少幾個鐘生意，起碼慳番唔少皮費。其實精品店目的係志在推廣立法會形象，唔一定要賺大錢嘅，但既然可以使埋啲冤枉錢畀長毛打官司，為何精品店蝕嗰幾萬元就咁緊張呢？立法會咁多做生意嘅議員，究竟佢哋條數點計嘅呢？