政情：李國章談黑客話當年 中大否認成監控目標
美國中情局前特工斯諾登大爆中文大學都係美國網絡監控對象之一，引來全城關注，但中大校方就否認傳聞。不過，曾經做過中大校長及教育統籌局局長嘅李國章（阿瑟王）尋日就爆料話，其實中大早喺○九年都試過被黑客入侵網絡。大家一聽到呢個消息，梗係好緊張咁追問阿瑟王係咪講緊被美國監控啦，點知佢竟然點頭，講講吓仲話當年佢做校長時都試過被黑客入侵，講緊係○九年前嘅事嘞！但再問詳情，佢無可奉告不特止，仲轉口風話自己講黑客嘅言論無根據，只係理論上咁講喎！
近年甚少露面嘅阿瑟王，尋日出席公共醫療醫生協會周年晚會，除咗爆料話中大試過被黑客入侵外，亦被大家追問佢係咪會如傳聞所言接任醫院管理局主席一職。阿瑟王就矢口否認，又話佢好享受退休生活，最近仲抱孫添，加上目前無人邀請過佢做醫管局主席喎。佢仲話，其實胡定旭（肥胡）呢個現任醫管局主席都做得幾好吖，可以繼續做落去喎。不過，其實肥胡已前後做咗九年主席，唔怕違反一項公職做多過六年嘅原則咩？點知阿瑟王就話，如果做得好就唔緊要啦！唔知大家係咪覺得肥胡真係做得好呢？