政情：司法不公 毓民誓抗爭
香港號稱法治之都，不過近年屢次出現胡亂判決，甚至「冤案」，先有隧道職員偷一蚊破財兼失業，再有的士司機因收多乘客五毫子惹來官非，令人為之嘩然。立法會議員黃毓民聯同多名法律界人士對法庭不公情況睇唔過眼，日前成立香港法學研究會為市民發聲，毓民更喺即將出版嘅新書中不諱言，指斥作為香港核心價值嘅司法獨立，已經開始被專權政治所侵蝕，佢聲言會繼續就司法不公抗爭。
毓民一向出名敢言，且多次同法官交手，所以對於法官判案嘅程序同理據都好有認識，加上早前佢因爭取撤回遞補機制被控非法集結被判罪名成立，所以佢就結集成《我在法庭的自辯》一書，講述佢睇到「政治專權侵蝕司法獨立」嘅情況。
如果要講「政治專權侵蝕司法獨立」，當然要有實例去支持。毓民喺書中自序中談到自己早前被控非法集結嘅案件，自言當時自辯咗六日，直指警方證詞有大量自相矛盾，甚至不符事實地方，但當時裁判官杜浩成不予接納，相反卻對警方口供照單全收，更喺裁決時指稱其證供「不誠實」。其後毓民列舉杜官往績，引證杜官顯然對示威遊行「特別反感」，自言呢次結集成書係對惡法嘅司法抗爭，又希望大家對裁判官有更深入了解。
不抗辯任由判刑作「抗命」
毓民之後語重心長話，有一種公民抗命手法係完全唔係法院抗辯，任由判刑以凸顯制度不公，呢種模式要抗命人數夠多，令抗爭對象嘅司法及監獄體系無法負荷，以及在抗爭得到國際注目時，方為有效。不過，港府對抗爭者檢控日漸升級，但只係選擇檢控小量頭面人物，而刑期亦未達到引起國際注目程度喎。
眾所周知，司法抗爭道路既長且遠，毓民形容自己對司法抗爭勝負未卜，希望喚醒港人關注司法獨立係香港最重要核心價值，已經開始被專權政治所侵蝕，唔知日後大家會否因毓民嘅言傳身教，多加留意「法出多門，各有各判」嘅情況呢？