中環出更：婦協嘉許現代六藝 漏咗「廚藝」
古時中國嘅君子必須掌握六藝、即禮、樂、射、御、書、數呢六種知識同技巧。不過，隨着時代嘅轉變，六藝嘅內容可能會起變化。香港各界婦女聯合協進會（婦協）為慶祝成立二十周年，首創舉辦「香港六藝卓越女性」獎項，選出城中二十位卓越女性。協會主席林貝聿嘉話，得獎人分別來自六個文藝新範疇，包括文藝、視藝、演藝、影藝、樂藝同體藝，但就欠缺廚藝。
林太話，舊嘅六藝於當今社會未必適用，因此以切合現代文藝界嘅分類嚟重新界定六藝。但為何新六藝之中欠缺廚藝？林太就恍然大悟話：「漏咗」，仲以好肯定嘅語氣話廚藝絕對係文化藝術之一，所以應該係七藝至啱喎。不過，可惜有關活動只辦一次，要籌辦七藝嘅卓越女性選舉就唔知要等幾時喇！
至於擔任評審主席嘅王英偉就話，今次新六藝其實同古時嘅六藝時有相似之處，例如體藝就可以視作古時嘅御同射，而文藝、樂藝又跟古時嘅書、樂相對應。另外評審之一嘅著名指揮家石信之就話，男女平等嘅意識日趨普及，將來個人嘅地位再唔係以性別嚟劃分，而係以成就論英雄喎。獲選嘅女性包括「牛下女車神」李慧詩、「風之后」李麗珊、指揮家葉詠詩等。
卓妮