中環出更：東華響應環保 研藥渣變肥料
珍惜廚餘成為大勢所趨，上任無耐嘅東華三院主席陳婉珍（Ina）都加入響應。原來東華三院轄下嘅中醫專科門診，每日都烹煮大批中藥，就咁丟棄會好浪費，所以早前佢哋就同浸會大學合作，研究將中藥藥渣進行廚餘堆肥，生產有機肥料。Ina話，研究成功的話，可以減輕堆填區負擔，減少浪費。
咪睇小Ina說話陰聲細氣，原來佢都有女強人一面。面對做主席後數之不盡嘅會議，佢從未呻過一個攰字：「我同董事局講，重要嘅會議，盡量唔好安排喺我需要照顧老公何鴻燊嘅日子，其他時間，幾忙我都唔介意。」
回想加入東華三院嘅七年光景，數難忘回憶，Ina毫不猶豫細訴一個感人故事。話說幾年前遇上一位品學兼優嘅窮學生，因家境貧困，恐難圓大學夢。
Ina聽見後，即與董事局成員商量，拍心口承諾：「就算佢（學生）最終拎唔到獎學金，我願意供佢升學。」最終Ina私人掏腰包資助對方讀書，該學生後來喺會考中考獲7A，不負所望。
陳婉珍教仔 講心唔講金
Ina笑言，希望自己子女都可以好似該位窮學生一樣，有顆堅毅不屈的心，所以從小教仔講心唔講金。三個子女愛食炸雞翼、焗鹹雞，Ina專登拜師學藝；照顧老公，樣樣都周到，為此學煮中西及葡國名菜。
到底何鴻燊最愛係咩菜色？Ina甜笑話：「梳夫厘焗魚同摩囉雞飯。」聽見都流口水。
卓妮