弊弊弊弊弊弊弊！呢鋪真係弊一弊都冇咁弊，弊到神仙難救嗰隻。你知啦，人有病梗係睇醫生，睇醫生當然要食藥，萬一食藥等於服毒，你話係咪弊弊弊弊弊弊弊傢伙吖？
環保組織綠色和平發布嘅最新調查報告顯示，中港兩地九個城市總共六十五個中藥樣本裏面，七成含有殘餘農藥。樣本來自中藥名牌同仁堂、雲南白藥以及胡慶余堂等等，田七粉殘餘三十一種農藥，枸杞子王同金銀花各殘餘十二種農藥，超標情況十分嚴重。當歸頭片樣本驗出嘅拌磷殘餘量超過歐盟標準三十倍。喂，農藥等於毒藥，中藥含有毒藥充滿黑色幽默啫，一心諗住醫病，隨時變咗攞命。正如綠色和平項目主任連佩怡話齋，用以醫療及養生嘅中藥材竟然發現毒害健康嘅農藥，徹底破壞公眾對中藥嘅信任，實在係極大嘅諷刺。
中藥含有農藥確係好大鑊o架，長期服用會干擾內分泌，損害男性生殖系統，並且影響兒童神經系統發育。所以咯喎，綠色和平促請中藥企業立即停止使用農藥，要求中國相關部門落實農藥減量政策，保障消費者同環境健康。
含有農藥嘅中藥既然係來自偉大祖國嘅國貨居多，中國政府當然有責任把關啦，之但係特區政府都責無旁貸。問題係港產官僚九成食錯藥，監管明顯出咗一個非常之咁大嘅漏洞，呢個漏洞話係黑洞都唔算誇張。即係咁，本地監管中藥嘅制度十分落後，一萬種中藥材之中只係列管一百四十種，不足百分之一點五。另外咯喎，政府只係規限九種殘餘農藥嘅分量，常見嘅金銀花同枸杞並不存在於列管中藥名單。更加可惡嘅係，港產官僚唔會公開檢驗程序以及結果，令到市民嘅健康毫無保障。
講到呢度，功夫茶不期然諗到一個毛骨悚然嘅可怕聯想。中國商界以奸詐見稱，奸商又以黑心聞名於世，為咗謀財往往不惜害命，中藥含有農藥已經得人驚，萬一所謂中藥根本係魚目混珠嘅假藥，肯定死得人多啦！
內地傳媒曾經做過調查，中藥材造假已經形成一條從源頭到成品嘅黑色產業鏈。中藥材市場價格不斷上漲，乜鬼嘢蟲草呀，乜鬼嘢燕窩呀，動不動好似黃金咁貴，見利忘義嘅情況之下，無良奸商弄虛作假以求牟取暴利就應運而生嘞。內地業界人士透露，造假不單止中藥材，仲包括部分中藥飲片。質量難以得到保證嘅中藥飲片賣去醫院以及中成藥製藥企業，最終去到消費者手上。
所以話齋，負責把關嘅官僚係唔可以食錯藥o架，必須切切實實防止假劣中藥遺害人間，否則遲早一鑊熟！