能夠成為馬會會員係身份象徵，做到馬主兼夾拉到頭馬更加可以威吓。不過，原來一班身兼立法會議員嘅馬主，都唔係個個想出風頭，好似鄉議局主席劉皇發咁，聽聞佢有幾次贏馬都唔敢現身馬場，寧願靜雞雞匿埋一邊享受掌聲。原來因為立法會逢周三開大會，撞正跑馬地跑夜馬，好多議員都唔敢光明正大入馬場，費事被記者影到佢哋唔開會走去吃喝玩樂，兼夾損害立法會形象。
據聞今年唔少新丁議員兼馬主都好守規矩，例如金融服務界張華峰、工程界盧偉國等，都驚高調累事，就算名下愛駒出賽都唔敢到馬場打氣，寧願留喺立法會開會，呢啲咪叫「身在立法會、心在跑馬地」囉！
不過，有人乖乖留守會議廳，亦有議員闊佬懶理，聽聞做咗馬主十幾年嘅地產及建造界議員石禮謙（大舊石）、飲食界張宇人（肥仔張），就係馬場常客，逢星期三都入馬場，而且任影唔嬲，認真有性格。
有政圈中人講笑話，講得誇張啲，官員喺馬場見到大舊石同肥仔張嘅機會，分分鐘仲大過喺立法會。如果呢個講法成立，咁過去幾次立法會因為唔夠人而流會，唔知有冇佢哋份呢？