特首梁振英（CY）上任快將一年，成績如何自有公論。不過，立法會議員黃碧雲（一舊雲）就依賴一堆數字評定CY功過，原來只係翻炒歷年香港大學民意研究計劃調查數據，比較CY同「貪曾」前特首曾蔭權爵士上任後首十一個月嘅民望，就得出結論話現屆官員嘅表現不及前朝同期喎，認真兒戲。其實一舊雲都就快做咗一年議員，仲喺度炒冷飯博曝光，唔知各位九龍西嘅選民又點樣評價呢位議員嘅議政能力呢？
一舊雲憑住一堆舊數字，愈講愈起勁，又批評問責制儘管已經推行多年，但仍然成效不彰，政府無法藉問責制為香港成功培育政治人才，各局長嘅能力普遍仍無法得市民認同，可見問責制是愈來愈失敗，政府應盡快檢討其用人方針，並向市民問責。
其實一舊雲嘅建議都值得白鴿黨參考吓，點解？雖然白鴿黨成立多年，但對培訓新丁議員仍然成效不彰，部分新丁曝光率只能喺低位徘徊，冇乜市民認得，有議員仲要靠炒冷飯爭曝光，邊個就唔使多講喇，可見該黨培訓愈來愈失敗，該黨應盡快作出檢討，並向市民問責，「給香港一條活路」嘛！