政情：退市風暴 黃友嘉教路 揸現金最實際
美國退市觸發全球股市震盪，港股跌勢未止，恒指更插穿二萬點，係咪時候撈底？認真難測。本身係經濟學博士嘅中華廠商聯合會前會長黃友嘉（David）就話，即使退市消息已出，唔代表全球股市已經見底，現階段仍然風高浪急，所以投資之道都係嗰句：「Cash is King」，揸現金最實際。
退市警號一出，全球股市嚇到腳軟，David就大派定心丸話，美國部署退市早喺市場預料之內，大家唔使心慌慌。市場永遠係有危就有機，股市跌到呢個位，撈得貨未？David就擰擰頭話唔敢亂猜，怕一旦開口唔中，隨時被人鬧，佢話現今市場變化太快，投資者想投機獲利唔係咁易。
施榮懷唔憂樓價急瀉
廠商會會長施榮懷（Irons）就樂觀啲，佢話唔怕股市大冧，已部署「彈藥」分批入市掃貨，較睇好工業及科網股，貪佢哋有實力。講到樓市，Irons推測唔會「大散」，事關樓市炒風唔及九七咁瘋癲，即使美國步入加息周期，唔少買家仍然有「食力」，唔會賤賣層樓，所以唔擔心樓價會急瀉喎。