政情：「新社聯」夠煞食 行不改名
俗語話「唔怕生壞命，最怕改壞名」，所以話名字對人或團體嚟講都係好緊要。新界社團聯會成立咗二十幾年，佢哋個簡稱「新社聯」經常都被人誤會，無論外界或內部都對呢個名有意見。有人就覺得新社聯個名太老土，亦有人覺得個名好容易令人聯想到一啲有勢力嘅江湖社團，甚至有人誤以為佢哋係社工組織添！不過，唔知係咪新社聯個朵夠煞食，做每樣嘢似乎都路路暢通，所以聯會決定唔改名咁話。
曾被投訴似江湖社團名
新社聯喺一九八五年成立，雖然已經有二十幾年歷史，但佢哋個名都仲係經常被誤會。其實佢哋好耐之前都已經為團體嘅簡稱而煩惱o架喇，大家都覺得團體名有六個字咁多，嗌起上來又長又噚，所以大約十年前就有人建議叫「新界聯」、「新社聯」或「新聯會」。當年有學者寫文章提到佢哋時就用咗「新社聯」呢個簡稱，久而久之大家亦都習慣咗用呢個簡稱。
不過，不論外界或新社聯內部，其實都對呢個簡稱有啲意見。有人就投訴過新社聯呢個名好似啲有勢力嘅江湖社團，介紹嘅時候可能會嚇親人。亦有人將新社聯同香港社會服務聯會嘅「社聯」簡稱混淆，唔知仲以為係另一個社工組織。
遊行示威 官員即接見
雖然大家對新社聯嘅簡稱意見多多，之但係原來呢個名又幾好使好用。可能因為個名夠「惡」，喺新界啲人都忌佢哋幾分，就連舉行遊行示威、向政府表達意見時啲官員都即刻接見，所以聯會決定都係唔改名喇。
眾所周知，新社聯過去多年來選舉一直係幫其他建制黨派抬轎，做咗「阿四」咁耐，都想打正旗號參選，所以前年嘅區議會選舉已經有唔少成員打正新社聯嘅旗號參選。
其實過去工聯會同新社聯嘅處境差不多，都係幫人抬轎，但工記好早就睇準時機，識得打正旗號參選，起步較早有着數，雖然新社聯起步比較遲，但係有心唔怕遲，事關呢個都係大勢所趨。