中環出更：霍啟剛 李文斌瞓身宣傳「鋒雲會」
匯聚唔少城中富二代嘅香港青年聯會將於七月換屆，常務副主席霍啟剛將會「升呢」做主席，副秘書長李文斌（Edmond）亦將榮升副主席。尋日二人齊現身，為本月三十日舉行嘅「鋒雲」論壇瞓身宣傳，另外亦宣布會喺十一月舉行一個創業比賽，鼓勵年輕人勇於嘗試，預料兩項活動共耗費不少於五百萬元，認真揼本，莫非佢哋要為上任打響頭炮？
搞比賽論壇 料花逾5百萬
據啟剛介紹，有關論壇將於亞洲國際博覽館舉行，邀請藝人謝霆鋒及阿里巴巴集團主席馬雲等成功人士，與輕人分享創業心得。佢話今次請到馬雲演講好難得，事關年前菁英會都曾經邀請過對方來港演講，由佢負責接待。點知演講前一日，馬雲突有緊急會要開，未能準時登機來港，最終要包架私人飛機，趕喺半夜抵港，並出席翌日活動，令啟剛印象深刻。
Edmond話個活動一出街做宣傳，反應出乎意料地熱烈，有達八千人報名參加，並將在亞洲國際博覽館舉行。
啟剛料兩項活動加埋，耗費逾五百萬元，睇嚟佢哋未來要積極撲水喇。