中環出更：圓玄一甲子 各界齊祝賀
崇奉儒、釋、道信仰嘅圓玄學院，日前舉行成立六十周年晚宴，逾千名城中宗教領袖、慈善團體及政商界名流齊去送上祝賀，包括香港道教聯合會主席梁德華、佛教聯合會副主席兼寶蓮寺住持釋智慧法師、中國道教協會副會長張繼禹及孔教學院院長湯恩佳等人，場面好墟冚。圓玄學院主席陳國超細數圓玄一甲子走過嘅足迹，希望未來繼續宣道弘毅，為社會有需要人士送暖。
當日到場嘅仲有仁濟醫院主席梁昌明、博愛醫院主席曾耀祥及仁愛堂主席陳鄭玉而等人，主人家圓玄學院鄧錦雄、湯修齊及趙耀年三位副主席齊出動招呼賓客。
小恩子獻唱成名曲
前全國人大常委曾憲梓新抱黎瑞恩亦現身捧場，雖然小恩子放低支咪多年，但當晚再為慈善而唱，再度演繹當年成名曲《一人有一個夢想》，甜美聲線未變。
卓妮問小恩子暑假有冇打算帶小朋友去玩，佢就甜笑話，十歲大女及八歲細仔將一齊參加海外遊學團，返港後全家將會去泰國度假，事關小朋友好鍾意游水。子女年紀咁細，放心畀佢哋去遊學咩？小恩子表情好認真話，訓練子女獨立更加重要。
致力宣揚孔子精神嘅湯恩佳就爆料話，正打算申請健力士紀錄。事關佢用咗二十年時間、耗資一億幾元，周遊列國宣揚孔教，至今已完成一千零三十場演講，相信全世界無人能及。
佢話最近講學重心喺內地，事關中國十三億人，極需要一種共同嘅精神信仰，否則難以凝聚人心。
卓妮