政情：吳秋北唔驚畀人鬧倒米？
今年七一特別多搞作，其中一樣就係七一購物優惠喇，有幾百間商戶參加，如果咁啱有嘢買，都有啲着數嘅。不過，呢啲優惠就吸引唔到工聯會（工記）理事長吳秋北喇，佢話冇咩特別嘢要喺七一買，仲話工記轄下嘅優惠中心已經夠實惠，咁講擺明賣花讚花香。其實工記都有份搞七一購物優惠喎，吳秋北唔驚畀人話佢倒米咩？
吳秋北話，佢平日會不時行吓工記嘅優惠中心，因為夠晒實惠。至於邊度有工記嘅優惠中心呢？佢話九龍同港島區都有，但由於難搵舖位，而且租金貴，所以新界方面就開唔到幾多間喇。新界舖租仲貴過港島同九龍區？抑或係工記進軍新界區唔理想，費事搞優惠中心嘥彈藥呢？乜唔係難打入嘅地區先至要開多啲優惠中心做宣傳咩？
另外，原來吳秋北啱啱去完瑞士日內瓦開國際勞工大會會議，佢話相信香港嚟緊將更積極探討標準工時立法等勞工議題。雖然知道標準工時立法會好難達成共識，但認為探討係要大家理性溝通，如果一口咬定某啲結果嘅話，就乜都冇得傾喎。