葵盛東邨食水摻沙
公屋住戶食水乍現沉澱物，清洗水缸竟愈洗愈污糟！接連有葵盛東邨住戶發現，自去年起，每次清洗水缸後，食水必定夾雜大量沉澱物，嚴重時更持續一星期。區議員與居民皆認為事件極不尋常，懷疑與水缸清洗程序有關，房屋署卻仍以「低層單位較易積聚沙石」為由圖作開脫。立法會議員指食水與居民健康息息相關，要求房署正視問題，妥善監督清潔程序。
王太為盛興樓低層單位住戶，去年起發現每次清洗水缸後，食水即出現沉澱物，最近情況更漸趨嚴重，「次次洗完水缸，足足成個星期啲水都有沙石，朝朝洗面都整到成面沙，好似做磨沙咁！」除被迫以「沙水」洗面外，熱水爐亦疑因喉管塞滿沙石而損壞，「上個禮拜先整完，過幾日又因為塞晒沙壞咗！」
濾水器三日滿沙石
面對食水變沙水，王太直言已用盡方法應付，可惜仍於事無補，「就算用過濾器都冇用，唔夠三日已又塞滿晒沙石，如果啲水要煲嚟飲同煮飯，就要用『煲湯魚袋』包住水喉裝水，都唔知要捱到幾時？」王太指所居樓層的食水乃由水缸直接供水，懷疑事件與清洗水缸程序有關，要求房署盡快跟進。
「嗰啲係食水，點可以有沙石？」一直協助居民跟進事件的當區區議員周偉雄表示，除王太的單位外，亦有同屬由水缸直接供水的低層單位居民遇有相同情況，認為事件極不尋常，要求房署徹查。
葵盛東邨物業服務辦事處發言人證實曾接獲相關投訴，解釋因涉事樓層為大廈水缸供水的最低層，相對其他樓層較易積聚沙石。發言人又說，有關大廈曾因維修水缸需暫停食水供應，剛恢復食水供應時，缸底或有小沙石較易沖至水管內，令食水出現沉澱物，接獲本報轉介當日已再次清洗水缸。
本報介入 情況好轉
王太證實，房署在本報轉介後已再次安排清洗水缸，情況即時大有好轉。但周偉雄卻不滿房署以「低層單位易積沙石」作藉口，意圖為清潔工作草率作掩飾，要求房署檢討程序，確保居民有潔淨食水可用。
「洗完水缸啲水有少少殘留物唔出奇，但正常都會好快就冇，唔會成個星期都係咁！」立法會房屋事務委員會主席王國興亦質疑房署清潔水缸程序出現問題，令食水出現大量沙石，認為房署應從事件中吸取教訓，加強監督工作，防止同類事情再次發生。
記者：詹海萍