愈來愈多商會想擁有自己嘅「會所餐廳」，一來夠「飛士」，二來方便有個「私竇」聯誼吓。中華廠商聯合會（廠商會）去年都打鑼打鼓想搞間會所餐廳，專營福建菜，賣點夠晒新鮮，商會中人都話好期待，早前興致勃勃返福建試菜，又四出物色心水大廚組班開檔。我哋仲聽聞，中華出入口商會（中出）會所個大廚已經辭工，準備過檔廠商會會所，如果消息屬實，確係萬事俱備。
不過，正當廠商會準備騰出商會大廈一樓寫字樓做餐廳時，先至發現原來唔可行，究竟遇到咩濕滯嘢呢？原來係搞唔掂接駁條煤氣喉。據理解，該大廈樓齡已有番咁上下，想將煤氣喉接駁入大廈唔係咁容易，如果改裝電爐，又怕唔夠鑊氣，左度右度，廠商會高層最後都係決定擱置開會所嘅計劃。
廠商會搞唔成會所，咁原本過檔返新工嘅大廚點算呢？我哋尋日喺立法會遇到中出嘅代表黃定光（象哥），佢話早前中出會所裝修幾個月，大廚就索性話唔撈，但係咪過檔廠商會就唔知喇。不過，象哥就話若然大廚想回巢，佢都好歡迎，再見亦是朋友喎。其實中出會所都有好多名菜，如外皮香脆、內裏肉質細嫩嘅「拔絲咕嚕肉」，仲有大閘蟹等，大廚回巢，相信班會員都好受落嘅。