政情：金勞詹中環爆內幕
泛民主派部分立法會議員長期無回鄉證，已經唔係秘密，相反外號「潮州怒漢」嘅前立法會金融服務界議員詹培忠（金勞詹），尋日突然爆出驚人內幕消息。我哋尋日下午見金勞詹悠閒現身中環，問佢點睇最近鬧得熱烘烘嘅「佔領中環」行動時，佢除咗直言唔支持行動外，仲自動波爆出驚人內幕消息，聲稱中央明年八月會立例，講明會對「反中亂港」嘅人停止發放回鄉證，最長係為期五年喎！
親中人士話未聽過消息
金勞詹出名收風同爆料一樣多，而且語出驚人，我哋聽到佢個消息都半信半疑，於是先後向多名親中人士求證。不過，呢班親中人士都話未聽過呢個消息，其中有親中核心人士更直言，其實部分泛民依家已經返唔到內地，睇唔到有乜需要再擴大呢個範圍。究竟金勞詹呢次爆料有幾堅？真係金勞詹自己先至知喇，但都唔排除佢能夠獲得更高層嘅消息，所以好多嘢都講唔埋，係真係假，相信到時就知。