立法會漁農界一向都係投團體或組織票，所以界內好多人都無份投票，但漁農界議員何俊賢（高佬賢）卻先後喺元朗、西貢同金鐘立法會開設議員辦事處（議辦），連同最新物色嘅大埔議辦，至今合共有四個議辦，數目之多，睇怕喺功能界別議員中都係數一數二，分分鐘拍得住啲超級區議會界別議員，莫非高佬賢有意鋪路下一屆參選超級議員？
高佬賢笑言，自己冇咁嘅能力選超級議員，又話撇除金鐘立法會議辦，其餘三個議辦分布形成三角形，主要係方便漁民有需要時搵佢幫手：「無理由叫西貢附近嘅漁民搭巴士入大埔搵我，所以都要同人夾份喺西貢開番個議辦。」
除咗元朗、大埔等有較多漁民聚集，其實香港仔係另一個漁民集中地，當問及會否喺香港島開多個議辦時，高佬賢話凡事都要循序漸進，又笑言自己一年開三個議辦已經好急進，因為事實上接連開議辦嘅負擔都唔少，依家淨係每月租金合共都要三萬元，仲未計議辦嘅裝修同人工等開支，就算有實報實銷開支都要自己「科水」補貼喎。
不過，俗語有話「冇咁大個頭，就唔好戴咁大頂帽」，如果搞到議辦執笠就唔係幾好啦！