政情：賓館問題多 德成懶理
所謂嘅「皇帝唔急太監急」，原來喺政府每日都上演緊。話說近日有重慶大廈嘅賓館發生強姦風化案，案件震驚全港，嚇怕遊客之餘，更摧毀「重慶森林」形象；而近期有旺角無牌賓館火燭，都令旅遊業界擔心會唔會嚴重影響賓館業辛苦建立嘅形象。不過，主理規管旅館嘅民政事務局局長曾德成，就只係沉醉喺執法同檢控數字呢啲硬指標嘅光環，懶理賓館已存在多時嘅衞生同治安問題，搞到業界好鬼o架！
啱啱放完二十日大假，上星期先正式復工嘅德成局長尋日出席立法會，回應旅遊界姚思榮關注無牌賓館營運，同青年旅舍入住率偏低嘅問題。姚思榮話，無牌賓館猖獗，唔少賓館即使被當局檢控兼定罪都只係罰錢了事，罰錢當交租，轉個頭又故態復萌。相反，接受政府資助嘅青年旅舍往往冇人入住，要求政府正視。
去年定罪率僅百分之一
不過，德成局長就懶理議員申訴，一於有理冇理照稿讀，宣稱當局對無牌賓館嘅檢控數字兩年內幾乎翻兩番，達到一百二十八宗。不過，我哋翻查政府文件，發現雖然當局去年巡查咗近六千八百次，但提出檢控後被定罪嘅只有一百一十宗，換言之定罪率係百分之一。究竟牌照事務處人員嘅「突擊」搜查夠唔夠突擊？抑或牌照處只係敷衍了事，行過就當睇唔到呢？所以德成局長口口聲聲話巡查同檢控數字呈升勢，似乎有啲玩弄數字「偽」術喎。
另外，會上有議員反映有賓館衞生情況差，木蝨四圍跳兼治安差，成為罪惡溫床。有議員亦要求當局喺考慮將住宅單位改建為賓館嘅申請時，要考慮大廈居民意見。不過，德成局長亦一於好少理，只係一味重申當局只係關注賓館嘅結構同消防安全，其他嘢佢哋唔會理喎。如果一間屋冇倒塌或火燭危機，但就臭味熏天兼人身安全日日受威脅，德成局長又願唔願意親身入去住吓體驗吓呢？