政情：「京」見彩虹 蒙德揚解畫
「電器大王」信興集團創辦人蒙民偉逝世後，佢家人去年以佢名義，喺佢母校北京清華大學捐建咗棟蒙民偉音樂廳以作紀念。今年係該集團成立六十周年，蒙民偉長子兼集團副主席蒙德揚（David）上周喺上址舉行咗一場慶祝音樂會。就喺音樂會中場休息期間，奇迹突然發生，當嘉賓們向音樂廳外嘅天空一望，竟然出現一道清晰嘅彩虹，令David驚嘆不已。
當地十幾年冇見過
本來見到彩虹並不足為奇，之但係喺空氣渾濁嘅北京出現彩虹，就真係難得一見。David聽當地人話，已經十幾年冇見過彩虹，可能係北京最近連日降雨，將烏雲「清洗」得一乾二淨，最後就出現咗呢道「雨後彩虹」。David就笑言，可能係音樂會高手雲集，奏出彩虹都唔定，又或者妙韻樂章感動咗天上嘅父親，所以搭咗條「橋」到凡間相聚。
去年該集團推出麵包機，David話產品大受好評，但就成日畀顧客投訴市面嘅麵粉經常缺貨。David去年曾經講過，公司即將推出一部價值過萬元嘅「豪華版」電飯煲，佢尋日話產品尚在積極研發中，相信年底就會面世。