「大家出力同身邊人握手，握完就開懷大笑！」上午九時，烈日當空下的維園，有種聲音比蟬鳴還要響亮，就是「愛笑俱樂部」學員的咯咯笑聲。笑出健康協會主席Dick正指導學員進行「大笑練習」，多組動作生鬼有趣，例如扭腰跳草裙舞、誇張地扮飲牛奶、及模仿企鵝走路等。每做完一組動作，學員都會嘻嘻哈哈地仰天大笑，洋溢歡樂氣氛。

「成日話想開心 點解抗拒笑」

笑聲感染力最強！採訪當天，途人均對「愛笑俱樂部」學員行注目禮，臉上不期然流露一絲笑容，不少街坊駐足觀看及拍照，更有人即興加入，跟隨Dick的指導練習。目前俱樂部不少中堅分子，起初都是偶然路過，如三歲的詠桐小妹妹與嫲嫲，但至今她們已結伴參加半年，做完四十五分鐘練習後，詠桐的感想是：「好玩，好攰！」

「愛笑俱樂部」每逢周日聚集維園，發放「笑彈」。

Dick（左）致力推廣愛笑瑜伽，感染吳先生（右）參與。

「香港人成日話想開心啲，但點解咁抗拒笑？」Dick曾任職催眠治療師，發覺不少港人有情緒問題，總是愁眉苦臉，甚至治療多次亦無改善。他於○七年到台灣「學藝」，翌年返港全力推廣愛笑瑜伽，逐漸感受其效用，「有學員由最初唔太投入、怕尷尬，到後來笑得愈嚟愈自在，個人仲開心咗！」更曾有健康欠佳的學員對Dick表示，練習愛笑瑜伽後，變得更神采飛揚。

王太（右一）透過練習愛笑瑜伽，走出喪夫的陰霾。

詠桐

現時全職投入愛笑瑜伽推廣工作的Dick，最喜歡它的簡單直接，「啲動作人人都識，仲可以自己設計，其實重點都係想大家放聲笑！」在Dick感染下，就連不良於行的七十八歲張伯都每周坐輪椅來捧場，「香港人最緊要開心，唔好咁多政治爭拗！」愛笑擁躉吳先生憶述，某天在維園跑步時發現愛笑瑜伽，從此迷上，「真係好開心遇上Dick呢類有心人，希望愛笑瑜伽可以喺香港更加普及！」

維園憶亡夫 「愛笑」解煩憂

愛笑瑜伽令人忘卻煩惱，對於六十八歲的王太來說，更是一道溫暖的心靈雞湯，助她解開心結。老伴前年不幸去世，悲傷的王太獨自一人在維園思念亡夫，忽爾傳來一陣開朗的笑聲，從此認識愛笑瑜伽，愁緒盡消。

「練完一齊飲茶 識咗好多朋友」

「我本來好多愁善感，好怕醜、內向，練愛笑瑜伽之後，心境年輕咗，朋友都話我靚咗！」喪夫的王太現與女兒同住，參與活動後，她坦言感受到來自陌生人的愛，「個個嚟到開懷大笑，冇防人之心，有時練習完一齊去飲茶，仲識咗好多朋友！」

在「愛笑俱樂部」練習期間，緩步徑的另一邊，一名主婦正厲聲喝罵身旁的女兒。Dick所言非虛，學業、工作等壓力令港人笑一笑幾乎難過登天，不過，若這位母親肯停一停步，嘗試認識愛笑瑜伽，她跟女兒的關係也許會有所不同。

圖：甘偉倫

文：林偉軒

逢周日刊出

提名熱線:3600 9999

Fax:3600 9900

E-mail:like@on.cc