又到溫故知新嘅時候，功夫茶想同大家重溫一則關於黑心食品嘅順口溜：「從大米裏我們認識了石蠟，從火腿裏我們認識了敵敵畏，從鹹鴨蛋裏我們認識了蘇丹紅，從鮮魚裏我們認識了孔雀石綠，從火鍋裏我們認識了福爾馬林，從銀耳裏我們認識了硫磺，從奶粉裏我們認識了三聚氰胺……」夠精彩咯啩，咁都未算吖，隨着黑心食品不斷推陳出新，精彩陸續有來。嗱，今日又教識大家一個新名詞喇：從皮蛋裏我們認識了硫酸銅。
冇錯嘞，功夫茶今日想講嘅就係硫酸銅皮蛋。內地傳媒踢爆，全國產蛋大縣之一嘅江西南昌縣有奸商為縮短皮蛋醃製時間，竟以有毒工業硫酸銅代替傳統石灰、食用鹼等原料醃製皮蛋，醃製周期由正常兩個月縮短至一個月，估計每月有數千萬隻劇毒皮蛋銷往全國各地，甚至可能已經流入本港！
硫酸銅皮蛋對人體有乜害處？專家話，工業硫酸銅含有鉛、砷、鎘等有毒元素，食用後可能影響中樞神經，嚴重者甚至會致癌添。呢，連無良工廠嘅負責人都暗示「盡量少吃」，就知道呢啲劇毒皮蛋嘅危害性有幾大喇。
一如既往，內地當局例牌賊過興兵，毒皮蛋醜聞曝光後，相關部門派人調查，發現傳媒踢爆嘅三間皮蛋加工廠只有兩間有生產許可證，當局即時勒令三十間使用硫酸銅加工皮蛋嘅工廠停工。唉，國產官僚永遠都係後知後覺，唔知幾多毒皮蛋已經被人食落肚，依家先至勒令停工，遲唔遲啲吖？次次都要傳媒揭發先至識得做嘢，佢哋嘅監管責任又去咗邊吖？咪話功夫茶踢爆，奸商之所以橫行無忌，根本就係貪官包庇，官商勾結，禍害同胞，奸商固然罪該萬死，貪官同樣罪無可恕。
大家咪以為毒皮蛋唔關香港事吖，本港蛋類主要來自內地，其中就包括江西皮蛋，港人可能中咗招都唔知咋。食衞局局長高永文話喎，內地輸港蛋類全部來自註冊養殖場，受內地檢驗檢疫部門監管，有安全證明。嗱，官僚靠得住，豬乸會上樹，咪話內地監管部門信唔過，就算港產官僚都靠唔住嘅咋。當年致癌蘇丹紅鴨蛋及雞蛋搞到本港人心惶惶，時任衞福局局長周一嶽呢頭大大聲話毒蛋冇流入本港，嗰頭就自打嘴巴，話自己未全面掌握資訊喎，卒之要公開道歉認衰，醜態百出。
所以話，嘢唔可以亂食，說話更加唔可以亂講。高永文千祈唔好學周一鑊下巴輕輕，噏得就噏，最緊要打醒十二分精神，好好把關，如果唔係，萬一毒皮蛋攻陷本港，你吟詩都吟唔甩吖！