政情：盧寵茂骨折變真「鐵醫」
鐵醫真係變「鐵醫」！換肝權威嘅香港大學外科學系系主任盧寵茂，前幾日偷閒同成班皇仁書院校友踢足球賽，仲同聖若瑟書院對戰，點知畀人踢親隻「黃金右腳」斷骨入廠，要做手術鑲鐵片同釘駁番好啲骨，依家喺屋企養傷嘅佢自嘲「做咗真正嘅鐵醫！」其實鐵醫平時咁忙，今次當休養吓，今日仲可以坐定定同班仔女慶祝父親節。
笑稱係「足球老將」
鐵醫笑言，自己年紀都唔細，唔係足球「小」將，做「足球老將」先啱。而佢受咗傷都仲咁捧瑪麗醫院嘅場，仲靠「主場之利」搵番同事幫佢做駁骨手術，仲住咗幾晚院。
不過，佢話唔好霸住張病床，尋日就出院返屋企休養，明日就火速復工，慨嘆有排都冇得再踢波，揸車都揸唔到：「無計啦！碧咸都要收山啦！」
做換肝手術閒閒地都要長企幾粒鐘，咁盧寵茂點做呢？佢就講笑話：「Good question（好問題），一係單腳企，一係坐住做囉！」佢又拍心口話，自己班「伙記」（換肝團隊）好得，培訓有方，後繼有人，換肝服務絕對唔會因為佢斷腳而受到影響嘅。
咁我哋就祝佢早日康復，佢仲貪玩咁話：「多謝！好番就返嚟復仇！」