中環出更：日行萬步 李大壯兩月減卅磅
身軀龐大一向係港台商貿合作委員會主席李大壯（David）嘅招牌，但卓妮日前喺一個公開活動上，見到David赫然縮水幾個碼，昔日唐裝下遮掩不住嘅大肚腩消失無蹤，好似施咗魔法咁。David笑笑口話，四月初開始下定決心減肥，每日堅持行一萬步，又戒食肥膩嘢，多菜少肉，結果兩個幾月就成功搣甩三十磅。
老婆成推動力
乜嘢原因促使佢啲起心肝減肥呢？因為健康理由？點知David話唔係，笑言係因為老婆想同佢白頭偕老。卓妮記得四月底見David喺中環超市購物，當時着住牛仔褲嘅佢仲好大份，估唔到眨吓眼就瘦晒，真係難以置信。咁減肥達標未呢？David話仲要減多十磅喎！
卓妮現場仲見到香港錶廠商會名譽會長莊學海及光華新聞文化中心主任李應平密密傾，原來莊學海啱啱加入貿易發展局旗下港台商貿合作委員會，促進港台交流係三人嘅共同話題，唔怪得傾得咁盡興喇。