中環出更：越女名廚向莊偉茵老公取經
中電企業發展總裁莊偉茵（Quince）有個「業餘大廚」丈夫黃楚權（Adam），曾自封「御用閒人」，閒時樂於為愛妻下廚煮幾味。早前佢哋兩夫婦飛往越南峴港度假時，巧遇當地美女名廚Trinh Diem Vy（Ms Vy），仲即場交流廚藝。適逢Ms Vy想學煮幾味中國菜，日前來港向Adam取經，Adam即場示範炮製惹味XO醬及欖角雞蛋炒飯，Ms Vy試過都大讚頂呱呱。
據聞Ms Vy三代都係越南菜名廚，由一間街邊小店做到依家有五間餐廳，喺當地享負盛名，仲出過唔少食譜添。Ms Vy話，有見近年愈來愈多港人鍾意去越南旅遊，於是的起心肝學番幾道中國菜，打算將之加入越南菜式，已吸引更多港人光顧。
教整XO醬及欖角炒飯
當日Adam喺佢嘅私家廚房獻技，悉心挑選咗日本乾貝、雲南火腿、蝦乾、辣椒等材料，加上蠔油、生抽、冰糖調味，煮出風味一流嘅香辣XO醬。佢仲同Ms Vy分享獨門秘方，就係加入柴魚乾增加口感，減少乾貝分量，就可以減低成本。另一個秘密就係加入少許紅椒粉，令醬料顏色更鮮艷，又唔會影響味道。
卓妮見Ms Vy意猶未盡，Adam毫不吝嗇廚藝，即場加插一道自家製嘅欖角雞蛋炒飯，飯粒吸盡欖角嘅甘香，對方不禁高呼美味，食完一碗又一碗。Ms Vy臨走前，Adam仲送咗樽XO醬畀佢返越南與親友分享，對方好開心咁話，返到去一定會學以致用。
卓妮