啟德機場係無數香港人嘅集體回憶，當中最驚心動魄嘅回憶片段莫過於飛機低空掠過九龍城鬧市，站於樓宇天台嘅人幾乎「觸手可及」，當時算得上係蜚聲國際嘅世界級奇景。自從機場一夜之間搬咗去大嶼山赤鱲角，經過一輪雞手鴨腳大混亂之後重拾正軌，啟德機場正式成為歷史名詞。再經過兩任特首蹉跎歲月，十五年之後舊地終於獻新猷。
啟德機場搖身一變成為郵輪碼頭，前日開張大吉迎接第一艘幫襯泊岸嘅郵輪「海洋水手號」，帶來三千幾名遊客。你知啦，乘搭豪華郵輪縱橫四海係家陣最時興嘅旅遊玩意，客人個個都係消費能力高強嘅有閒階級，泊岸落客等於財神到，有助刺激本地經濟，當然唔可以怠慢啦，新簇簇嘅啟德郵輪碼頭能唔能夠做到賓至如歸嘅招財效果呀？弊就弊在交唔出一份亮麗嘅成績單囉，新開張嘅郵輪碼頭到處甩甩漏漏，令到遊客失望之餘，更加搞到迎賓嘅知客有少少唔好意思。
首先，郵輪碼頭嘅天花竟然漏水喎，失禮死人啦。其次，的士站居然冇車喎，遊客大排長龍左等右等先至等到的士接載。更加攞命嘅係碼頭設施應有盡冇，有人搵唔到洗手間，有人搵唔到兌換店，連理論上梗有一間喺左近嘅便利店亦芳蹤杳然，令人產生大而無當嘅空蕩蕩感覺。
喂，啟德郵輪碼頭耗資超過八十億元，點可以咁多甩漏o架？旅遊事務專員容偉雄話喎，碼頭的確出現漏水現象，強調碼頭嘅拱形外牆安裝工作複雜，必須小心處理。至於的士站冇車嘅問題，碼頭營運商WCT郵輪業務項目總監班智榮就話嘞，早於一個月前已經同的士業界商討，可惜司機唔想空車入碼頭，所以等候的士嘅時間會較長，碼頭會研究引入其他交通工具。
唉，郵輪碼頭嘅甩漏不期然令人想起赤鱲角機場當初嘅醜態，新開張嘅時候簡直倒瀉籮蟹，人流有人流嘅混亂，物流有物流嘅癱瘓。比較令人安慰嘅係，千辛萬苦撥亂反正之後，赤鱲角機場多次被評為全世界最優秀嘅機場。
一時甩漏唔代表一世出醜，麻煩碼頭營運商盡快執漏啦，香港始終靠旅遊業開飯o架，唔容許繼續怠慢客人。功夫茶唔奢望啟德郵輪碼頭被評為全世界最優秀嘅碼頭，令到客人滿意已經足夠。
講開又講，體積好似巨無霸嘅郵輪停泊香港，會唔會產生大量廢氣o架？既然香港已有停車熄匙法例，環境局係咪有必要研究「停船熄匙」呀？香港嘅空氣污染已經嚴重到極，郵輪再噴廢氣令到問題雪上加霜就唔好啦！