政情：廢腑之言：卿姐明撐「美國佬」
美國中情局前特工斯諾登（Edward Snowden）日前再向本地報章爆料，民主黨主席劉慧卿尋日就話，今次事件好新鮮，有爆炸性發展，如果斯諾登出嚟開記招，場面仲會勁過陳冠希宣布退出娛樂圈喎，聲言今次事件係香港好耐都未出現過嘅國際新聞。
對於斯諾登指美國喺引渡佢回國一事上有「bully」（欺負）港府之勢，雖然劉慧卿淡淡然回應話：「好多人都被佢（美國）bully過」，又話「美國佬」恰人並非新事，但佢就話斯諾登口講無憑，都係提出證據最實際喎。佢咁講法，即係又兜個彎撐番佢口中嘅「美國佬」囉！