政情：陳淨心報警抗跟蹤
從政嘅人多數都希望出街被人認得，但近月紅到發紫嘅愛護香港力量（愛港力）發言人陳淨心就唔係咁諗喇。陳淨心尋日喺社交網站訴苦，自爆最近日日被幾個陌生男子瘋狂跟蹤，呢班男子跟出跟入不特止，仲要坐的士追住佢部車足足十幾二十條街，佢停車，的士又停車，形迹可疑。雖然陳淨心表現得極為強悍，但咁樣被男人「死跟」法，都嚇到花容失色，最後要報警求助。
警方接報到場之前，陳淨心嘅友人為咗保護伊人，即時上前拍打的士車窗一窺跟蹤者全貌，又質問對方為何不斷死纏爛打跟蹤陳淨心。不過，的士入面嘅人可能被呢班護花使者嚇窒，一句聲都冇出就即時開車絕塵而去，搞到陳淨心到最後都唔知到底係邊個跟蹤佢。
抄低車牌網上公開
為免同類事件再次發生，陳淨心事發時相當機警，抄低咗跟蹤佢架的士嘅車牌，特別喺網上公開以儆效尤，又高調話：「如果我陳淨心少一條汗毛，警方可以從這車牌追緝兇徒。」人民力量成員袁彌明早前曾飽受追求者滋擾，後來仲要鬧上法庭，事情才告一段落。唔通今次嘅陌生男子同上次情況一樣，都係因為想見多陳淨心幾面，所以先至冒險瘋狂跟蹤？