以身作則教愛兒 跌倒要識爬番起
【本報訊】「希望以身作則成為個仔嘅榜樣，令佢學識跌倒唔緊要，但要識自己爬番起身。」兩年前的車禍令黎志偉跌落人生谷底，能令他重新振作回到攀石場再拚搏的最大動力，無疑是現時十六個月大的愛兒黎倬麟。他不奢望兒子日後成為攀石運動員，但堅決表明一定會親自指導：「希望佢從中學習到有困難都堅毅不放棄的精神，如果佢肯自己試吓攀石，就係我今個父親節最大嘅禮物！」
望子繼承衣鉢愛攀石
全身流着運動員熱血的黎志偉，極度享受攀石的樂趣，也曾因攀石揚威亞洲，自然希望愛子能繼承衣鉢盡得真傳，他表示：「曾經帶佢去過攀石場，幫佢綁咗攀石安全繩喺石牆邊吊高佢，不過只係兩米高，個仔已經呱呱喊，可能佢太細、唔鍾意束縛。」
一方面想重回賽場，但更加想有多些親子時間，愛子平日很活躍，最愛在父親的輪椅旁扭抱抱、嗲父親出街，黎志偉考慮放棄他的「特訓法寶」手動輪椅，他解釋：「買番架電動輪椅，方便帶個仔出街，雖然一路推手動輪椅，可以幫我鍛煉臂力。」
不過，黎志偉表明不會放棄教導兒子攀石，他說：「會再親自教，等佢試多幾次，不過唔會逼佢，費事佢有童年陰影，至於佢係咪發展、做攀石運動員就睇佢自己啦！」兒子會否繼承衣鉢言之尚早，但黎志偉最希望得到的父親節禮物仍由愛兒和攀石組成，他坦言希望「兒子嘗試攀石」能成為父親節的特別禮物。
已為人父的他同時也是兒子，他相信自己重返攀石場已為父親送上最好的禮物，黎志偉笑言：「其實真係無特別諗，但我估佢知道我可以康復得咁好，可以自己再攀番石，又強壯又堅毅，應該已經好安慰，呢份就係最好嘅父親節禮物！」