立法會下月中先放暑假，但立法會主席曾鈺成就趁下星期端午節假期休會一日，下星期一帶挈秘書長陳維安到訪英國國會五日。難得休會可以畀自己耳根清淨吓，曾主席今次肯定未出發先興奮。
除咗議員，冇得放暑假嘅問責官員都排緊隊起飛，好似成日唔見影嘅商務及經濟發展局局長蘇錦樑（Greg蘇），早幾個星期飛咗轉法國同比利時後，明日又跟特首走多轉美國精華遊，五日直踩紐約、三藩市同洛杉磯三個城市，認真和味！
Greg蘇被喻為外訪次數最多、開支最高嘅問責官員，今次一飛就一個星期，連同隨行人員相信又燒唔知幾多公帑。
其實立法會議員以至政府高官任內豪花公帑外訪，足迹可謂遍布世界各地，夠拍幾輯旅遊節目，好似立法會扶貧事宜小組委員會就計劃今個暑假，出訪消費指數極高嘅芬蘭同瑞典考察。
不過，納稅人火滾都冇用，皆因議員外訪同「貪湯」前廉政專員湯顯明酬酢開支一樣，都係「自己批自己」。