政情:林鄭「好擔心」廚房?

香港聖公會福利協會尋日為旗下社企舉行開幕禮,除咗福利協會執行委員會主席李國棟(Donald)主禮外,仲請咗政務司司長林鄭月娥主禮。期間Donald唔知因咩事咁緊張,開口夾着脷,將林鄭好關心呢間社企「好‧廚房」講成「好擔心」呢間好廚房。出名「好打得」嘅林鄭連政府呢個熱廚房都未驚過,反而好擔心入呢間好廚房?

與李國棟煮出佳餚

林鄭致詞時話,咁好嘅廚房,又唔係「熱廚房」,冇咩擔心,淨係擔心之後要同Donald一齊炒餸,皆因主辦單位安排咗個環節,畀自稱好耐冇入過廚房嘅林鄭同Donald發揮廚藝。雖然林鄭有大師在旁指導,但真係表現得戰戰兢兢,又不時瞄吓Donald煮成點,好似好緊張咁。最後兩人都合力煮咗味既有豬肉餅,又有杏仁嘅「泮塘曉月滿生輝」菜式,佢哋試味時,仲大讚自己煮得好味添!

之後主持人問林鄭平時有咩拿手小菜,佢就話蒜蓉蒸開邊蝦、菜遠炒牛肉。其實識煮呢啲菜,煮藝都唔簡單,只可惜佢丈夫同兒子在外國,否則肯定經常落廚,到時拿手小菜又點只兩道咁少吖!

第一手消息請下載on.cc東方互動iPhone/iPad/Android/Windows Phone Apps