政情：銀行界對佔中有口難言
「佔領中環」行動將會喺明日發起首個大型商討日，四大商會同唔少親中團體已經紛紛以登廣告或撰文形式痛陳利害反對佔中，但掌握中環命脈嘅金融同銀行界就似乎依然冇乜動靜，唔通佢哋覺得佔中只係小事一樁，唔值得關注？金融界立法會議員吳亮星（星爺）尋日解釋，銀行界其實一直密切留意佔中行動發展，只係啞子吃黃連，有苦自己知。
唔想亂用股東錢登廣告
星爺話，銀行界並唔係唔想出聲批評佔中影響本港金融中心地位，只係唔想向外界錯誤傳遞訊息，所以先至一直按兵不動，免助長佔中嘅氣焰。至於點解唔登廣告反對佔中，星爺就話銀行界素來唔主張亂用小股東嘅血汗錢。
中環幾乎雲集世界全國頂尖企業，本港三間發鈔銀行總部都設喺此地，星爺話自○三年沙士一役後，金融管理局要求各銀行制訂應變方案，萬一有重大事故或災難發生，銀行都可以即時啟動方案，將網上交易等服務轉移去其他國家，短時間內確保服務不受影響。
雖然銀行運作仍然可以勉強維持，但星爺話如果佔中到時引起國際投資者憂慮，覺得香港唔再係安全城市，本港國際金融中心地位可能從此一蹶不振，落後其他鄰近地區，到時邊個為事件負責呢？