政情：象哥同政府算帳
立法會議員除咗享有每月酬金及每年開支償還款額外，每屆任期仲有筆一次過津貼，包括開設及結束辦事處開支，但呢筆津貼並無寫明可供議員聘請助理或結束辦事處後支付員工遣散費，而結束辦事處津貼規定喺完成任期後才可申領。咁啱得咁蹺，進出口界議員黃定光（象哥）最近有個服務多年嘅老助理退休，佢因而要墊支一筆長期服務金，又擔心完成任期後唔合申領資格，揚言到時會申請司法覆核。
威脅進行司法覆核
立法會議員酬金及工作開支償還款額小組委員會尋日開會，作為委員嘅象哥就揭露申請結束辦事處津貼嘅疑問。象哥話，議員卸任後通常都會有筆實報實銷嘅津貼作為支付助理遣散費，但如果助理中途唔撈或退休，佢就要即時墊支一筆遣散費或長期服務金，佢建議政府政策應該靈活啲，唔使等議員落莊先攞到錢。不過，最大問題係，象哥墊支呢筆錢，係咪容許喺卸任後申領，行政署都唔敢講實。
對於象哥建議提早申領部分結束議員辦事處津貼，行政署長蔡潔如就「耍太極」話要再研究吓，但佢同時強調，議員助理中途自行辭職係唔使支付長期服務金嘅。此話激到象哥紮紮跳，佢話自己守法、政府都應該守法︰「如果政府唔改政策，呢筆帳記到我執笠落莊都要攞番，我可以JR（司法覆核）佢，潮流咁興司法覆核！」如果唔係象哥遇到如此難題，相信呢個問題Ｎ屆之後都冇人關注。
象哥之所以咁緊張，皆因佢呢位年屆六十五歲嘅助理已經幫咗佢兩屆任期，長期服務金計落有成六位數字以上，即係象哥要墊支自己一個月酬金都唔止。其實議員助理薪酬已經一向被指偏低，如果連長期服務金都話要等到議員卸任之後先支付，就真係冇陰功喇。另外，尋日有議員建議將議員助理薪酬同公務員薪酬掛鈎，但蔡潔如就以兩者工作性質唔同，同埋要畀議員彈性為由拒絕。