政情：洪為民升呢法學博士生
話咁快又到端午節，好多香港人都鍾意去睇龍舟競渡，但菁英會榮譽主席洪為民（Witman）就要喺荷蘭海牙度過，皆因佢要以法律援助服務局委員身份出席國際法援會議，睇怕要食芝士代替龍舟糉應節喇！
IT人出身嘅Witman，年前修畢中國人民大學法學碩士後，愈讀愈有癮，近日報名讀埋法學博士。雖然佢嘅筆試已合格，但日前上京面試時，就遇上麻辣考官，質疑香港學生論文寫得麻麻，又鍾意最後一分鐘先交功課，問佢會唔會有樣學樣。Witman聽見，當然拍心口保證唔會，仲話預咗要頻頻飛北京上堂。
研法援體制 荷蘭取經
Witman之所以修讀法學，皆因佢有興趣研究全球法援服務體制，稍後將去荷蘭取經，事關當地法援服務好值得香港借鏡。升呢做博士生，點都要慶祝吓，Witman日前就相約騰龍青年商會會長陳龍盛、IT界才女李煥明及中山港澳台青年交流促進會副秘書長謝嘉恩，去尖沙咀意大利餐廳Sabatini品嘗時令德國露筍，開心到極。