中環出更：過來人陳鄭玉而 為單親家庭「加油」
單親家庭個案近十年激增三成三，當中唔少都拒絕接受輔導。仁愛堂日前舉行就職後首個活動，新任主席陳鄭玉而（Connie）急不及待宣布連串大計，重點係增設「陽光加油站」計劃，一站式支援單親家庭。曾經係單親媽媽嘅Connie對此感同身受，明白佢哋最需要嘅係自強，期待計劃能夠為佢哋走出陰霾。
仁愛堂籌款 潮玩萬聖節
一向「潮」得起嘅仁愛堂，今年十月仲有個全港首辦嘅籌款活動，就係由美國發起嘅「Halloween大遊行」。Connie話，有見近年唔少年輕人愛喺萬聖節扮各種造型，於是順應潮流搞埋一份，藉此吸引新一代邊玩邊做善事。
去年成功帶領學生挑戰珠穆朗瑪峰嘅副主席陳婉珊（Clara），下月再接再厲帶二十名學生到東非肯尼亞睇動物大遷徙，並探訪原始部落家庭。由於今次近距離接觸當地兒童，好可能會感染到傳染病，Clara早前連續打咗四支預防針，稍後仲要食預防痢疾藥物。今屆「升呢」做副主席嘅羅台秦（Louisa）亦資助望遠鏡畀出訪嘅學生，等佢哋可以高清觀賞動物。
當日Louisa與老公戴澤良恩愛現身，卓妮見佢心口掛咗塊好靚嘅玉牌，原來係佢已故嘅父親當年所送贈。佢透露最近愛上玉石，仲學埋玉石鑑賞添。另外，今屆董事局多咗唔少新臉孔，總理賴楚惠、梅會雅、袁譚玉琼、楊素梅等都係事業有成嘅女強人，認真人強馬壯。袁太之前都曾經做過仁愛堂總理，今次再度返回大家庭，希望將善心延續。
卓妮