所謂重慶森林，講嘅係位於尖沙咀嘅重慶大廈好似森林咁得人驚，禽獸出沒，弱肉強食，森林規則係全無規則可言。功夫茶早一日同大家研究過重慶大廈嘅罪惡問題啦，關鍵原因係警方懶執法，終於縱容出色魔強姦民女嘅風化案，嚇到街坊同遊客雞飛狗走，紛紛對重慶森林敬而遠之。
其實除咗重慶森林之外，香港仲有好多罪惡溫床o架。好似坐落尖沙咀金巴利道嘅香檳大廈咁吖，打從九十年代開始成為一樓一鳳嘅大本營，吸引唔少尋花問柳嘅中外嫖客撳鐘仔。既然鳳姐上上落落，又有嫖客出出入入，香檳大廈就變得品流複雜嘞，曾經發生過好多宗搶劫案，甚至有鳳姐幾乎被賊人辣手摧花。
講起艷幟高張嘅香檳大廈，功夫茶諗起直教嫖客也折腰嘅一筆風流糊塗帳。民主黨前總幹事陳家偉原來係香檳大廈嘅識途常客，好衰唔衰頭頭碰着黑，上得山多終遇虎，撳得鐘多終自斃，尋鳳之路偏偏遇上記者直擊報道。斷正嘅偉哥醜事傳千里之後，頭耷耷辭職兼退黨，黯然離開前途本來無可限量嘅政治舞台。
如果話香檳大廈係一座引人犯罪嘅「毒樓」，咁油麻地平安大樓亦不遑多讓。業主立案法團主席江女士承認，平安大樓治安一向差，不時有毒品交易，流鶯問題更加令人頭痛。龍蛇混雜之餘仲有消防隱患喎，事關平安大樓賓館林立，走火通道擺滿床褥之類嘅雜物，一不留神發生火警，走投無路嘅後果實在不堪設想o架。
高危毒樓區區有，梗有一棟喺左近。譬如旺角嘅新興大廈啦，又譬如灣仔嘅富士大廈啦，至於新界區嘅元朗咯喎，毒樓集中喺有「色情四街」之稱嘅同樂街、谷亭街、炮仗坊以及安寧路。鳳姐招搖過市嘅背後，少不免黑社會操縱，你話色情四街有乜可能唔係罪惡溫床吖？
講到尾，撲滅罪行始終要警務人員勤於巡邏兼夾勇於執法，若然懶懶閒得過且過，黃賭毒嘅治安問題只會不斷惡化o架咋。毒樓嘅存在就好比毒瘤侵害人體，癌細胞一旦擴散開去，唔死都一身潺，醫番都嘥藥費。所以咯喎，唔該警隊一哥曾偉雄正視問題，唔好淨係掛住打壓示威人士，更加唔好挖空心思創作「黑影論」講故事。你知啦，警務人員嘅正職係對付作奸犯科嘅壞蛋，唔係飾演蠻不講理嘅「港產公安」呀。
正所謂物以類聚，犯罪集團最鍾意蛇鼠一窩，黃不離賭，賭不離毒，警方若然明查暗訪死咬不放，剿滅犯罪集團唔會十分困難囉。怕就係怕執法者唔知點解鬆手，治安不靖嘅受害者係奉公守法嘅良好市民。