立法會尋日討論生育政策，人民力量陳志全（慢必）話香港女性並非唔恨生仔，又話佢哋既有性慾，亦都肯「日做夜做」，但因為太過遲婚，生理條件唔係太容許，要求政府提供卵子儲存服務，或者索性設立卵子銀行幫嗰啲遲婚又想生仔嘅女性。負責人口政策嘅政務司司長林鄭月娥就話，本港人口數據顯示女性傾向遲婚，又話根據兩年前嘅數據，年過四十歲但係仍然未婚嘅女性亦都佔咗一成七，反映獨身情況令人擔心。至於會否接納慢必提出嘅建議，林鄭就話政府會一併考慮喎。
