政情：黐到實當正係媽媽 潛水籲保育 EQ遭「鯊吻」
後日就係一年一度嘅世界海洋日，對海洋生物情有獨鍾嘅立法會議員葛珮帆（EQ），日前就特登去海洋公園水族館潛水睇鯊魚，兼順手宣揚保護瀕危海洋生物訊息。當EQ潛落水底準備同隔住塊玻璃嘅遊客打招呼時，有一條身形同佢差唔多大小嘅豹紋鯊突然游近，仲好親切咁用鼻觸碰EQ臉龐，遠睇就好似錫咗伊人一啖咁。
預咗畀環團鬧
豹紋鯊親親EQ後，仍然唔捨得離開，廿幾分鐘內全程黐到EQ實一實，好似當正EQ係鯊魚媽媽咁。難得有鯊魚主動接近，EQ亦顯得非常受落，伸手抱抱豹紋鯊之餘，又摸吓鯊魚滑溜溜嘅背脊，之後仲好興奮咁同鯊魚一齊打圈跳舞。不過，除咗呢隻豹紋鯊，大部分魚類似乎好怕EQ呢個突然闖入水底嘅陌生人，唔肯停低同EQ影相。
EQ話，佢已經有心理準備會被環保組織批評，鬧佢去海洋公園潛水等同縱容園方將魚類困喺籠內畀人欣賞，但就話希望大家可以將重點集中於宣揚保護海洋生物，事關唔少海洋生物因為遭受人類大肆殺戮而面臨絕種危機，包括錘頭鯊、角鵬、藍鰭吞拿魚及酒樓常見嘅蘇眉等。