政情：關注信含「魔鬼細節」 白鴿反填海諮詢奪私隱
港府正就優化土地供應策略進行諮詢，其中一項策略就係填海。話說馬料水填海關注組近日再就政府嘅填海建議發起「一人一信反填海」，信件列出四大反對原因，市民只要喺信中填寫個人資料，就等於支持佢哋嘅反填海計劃，去信政府反映意見。不過，我哋就發現信件竟然「魔鬼在細節」。
有關信件底部有一行細過兩毫米嘅字句，寫上「個人資料聲明：我同意民主黨及游月華社區主任按照個人資料政策與我聯絡，包括活動資訊及選舉、募捐呼籲等。」即係市民一旦填寫有關信件後，除咗表達反對填海意見外，亦同意畀白鴿黨及游月華使用其個人資料，如果冇留意呢行聲明，個人資料畀白鴿黨收集咗都唔知。
關注組召集人游月華回應查詢時話，絕對唔係綑綁市民提交資料，因為市民可選擇將信件交畀佢哋，又或者直接寄去土木工程拓展署喎。
不過，既然關注組冇掛出白鴿黨個招牌，就算召集人係白鴿黨員，點解收集嘅資料要畀白鴿黨用呢？更何況特意用咁細隻字去避開法律責任，以收集市民嘅資料作日後之用，做法有啲離譜囉！