政情：商交所爆煲 田少抽盡水
商品交易所爆煲事件，證監會同警方已經介入調查，點知自由黨黨魁田北俊（田少）尋日突然出招，要求喺明日立法會內務委員會上引用《權力及特權法》徹查商交所同證監會。此舉令本來唔使表態嘅建制派突然焗住要投票，投贊成好似幫自由黨抬轎，投反對又好似與民為敵，令建制派對田少以至自由黨極為不滿，感覺田少玩嘢。
門檻高 非動輒引用
田少話徹查商交所同證監會，皆因今次事件分分鐘影響香港國際金融中心聲譽，唔調查唔得。但聽聞田少出招前，只係喺手機應用程式WhatsApp嘅建制派群組詢問其他建制派議員係咪支持，當時都冇人表態撐佢，以為佢開玩笑，但無人估到佢嚟真，所以尋日下午三點幾鐘，建制派即時開會商討對策，田少亦乘機游說建制派支持。
結果民建聯（民記）講明反對田少動議，主席譚耀宗話現時冇必要搞埋啲咁嘅嘢，仲話立法會無啦啦介入事件，絕對唔係好事，擺到明不屑田少抽水所為。新民黨葉劉淑儀亦話《權力及特權法》要好高門檻，唔係郁啲就引用，暗批田少亂咁嚟。
雖然民記同新民黨企硬反對，但其他建制派就持觀望態度，工聯會要明日先至有立場，而其他建制派亦詐傻扮懵，只有謝偉俊、金融服務界張華峰、地產建造界石禮謙同廠商會林大輝傾向支持田少。
自由黨內部都未夠票
由於廿七名泛民主派議員全部支持田少動議，再加上八位建制派支持，基本上明日內會嘅動議好大機會通過，但去到真正有約束力嘅周三大會就要分組點票，聽聞自由黨到呢一刻都未數夠票，但就做到逼人表態嘅效果。
由於今次動議好有可能燒到證監會，所以政府零舍緊張，財經事務及庫務局局長陳家強親自打畀梁家傑游說，副局長就打畀湯家驊，唔通連政府覺得公民黨耳仔軟，最易轉軚？其實唔少建制派最嬲係覺得自由黨唔夠票，點解仲要提動議呢？認為該黨想出風頭居多，所以估計喺今次之後，建制派同自由黨嘅牙齒印又再加深喇！