中環出更：積極備戰龍舟賽盼「廠」出名堂
端午節下星期就到，中華廠商聯合會青年委員會一班兄弟姊妹，繼去年參加赤柱龍舟公開男女混合賽後，今年再接再厲。眼見賽期將近，佢哋亦加緊練習，上周六下午，卓妮就跟住副主任張永鴻（Philip）、劉子芸（Vanessa）、顏明秀（Candy）、吳景瀚（Kevin）、羅程剛等一行二十人，浩浩蕩蕩咁前往扒龍舟勝地赤柱正灘練習，率先感受吓比賽嘅熱鬧氣氛。
當日烈日當空，三十幾度高溫之下，大家拋開平時着住嘅西裝外套，換上黑超及背心短褲，搽定太陽油整裝待發。雖然大家都做足防曬措施，但練咗個幾鐘已經熱到汗流浹背，難得佢哋唔介意，用盡全力揮動木槳係咁扒。同場仲有警隊、消防等龍舟隊伍喺度練習，青委們不忘向對方「偷師」。
無懼驕陽 傳承中華文化
今次青委們有「王牌」在手，就係由青委胡子岐（Gary）擔任領隊喇。擁有逾五年扒龍舟經驗嘅Gary，曾經喺過往賽事中摘冠，佢話覺得呢項運動好有意義，既可傳承中國傳統文化，又可鍛煉體能兼減壓，好處多多。Candy就話，多得會長施榮懷、各副會長及會董慷慨捐出十萬元經費支持活動。
第二度參賽嘅委員王詩雅（Celia）話，曾經以為扒龍舟淨係講臂力，原來腰力都好重要，練習咗數次，條腰不知不覺間結實咗，成個人fit晒。佢仲話，今次有唔少新加入嘅青委一齊玩，大家好快就打成一片。問佢哋嘅信心如何？大家都笑言，友誼第一，比賽第二，志在參與喎！
卓妮