重慶森林，禽獸出沒，注意注意！
尖沙咀彌敦道重慶大廈外號重慶森林，品流複雜係人都知，蛇鼠一窩無人不曉，勢估唔到原來亦係罪惡淵藪。重慶大廈近日又發生一單涉嫌強姦案，雖然警方閃電破案，不過成件事已經震驚全港，甚至嚇怕來港遊山玩水兼購物嘅旅客，搞到原本屬於觀光景點之一嘅重慶森林變得臭名遠播。
大家都記得香港以前有一個三不管地帶叫做九龍城寨，裏面烏煙瘴氣到幾乎生人勿近，黃賭毒亂七八糟乜鬼都有。家陣嘅重慶大廈會唔會係另一個無政府狀態嘅九龍城寨呢？睇怕確係有機會(口架)，而且係九龍城寨國際版，事關裏面充滿形形色色嘅外國人士，膚色人種南腔北調應有盡有，淨係冇外星人咁解。
九七回歸主權交接之後，中英港齊齊不管嘅九龍城寨已經成為歷史嘅集體回憶，照道理重慶大廈都唔應該毫無管束吖。弊就弊在香港警務處真係好似隻眼開隻眼閉喎，任得呢一座龍蛇混雜嘅森林淪為禽獸安樂窩，打交無日無之，爆竊時有所聞。講真吖，唔少奉公守法嘅香港人對重慶大廈敬而遠之，冇人帶路都唔敢入去見識乜嘢叫做「特區之中嘅特區」。
正如油尖旺區議員關秀玲話齋，重慶大廈罪惡叢生定必破壞香港形象，警方必須加強人手巡邏撲滅罪行，就好似你明知有蛇蟲鼠蟻而唔去滅蟲，警方唔做嘢只會令問題愈來愈嚴重。城大專業進修學院學術統籌宋立功仲話呀，重慶大廈背景特殊，不同國籍人士混雜其中，隨時會被用作全球情報交流站。你知啦，香港一向都係國際三大間諜中心之一，重慶森林話唔定係特務窩點(口架)。
綱紀廢弛除咗造就犯罪分子胡作非為之外，無牌賓館以及無牌食肆亦會帶來消防隱患。即係咁，有人喺樓梯放置垃圾桶，有人喺走廊設立接待處，有人喺通道佔據晾衫位，萬一唔覺意火燭，阻手阻腳嘅雜物阻礙逃生，隨時火紅火綠一鑊熟。
所以計功夫茶話齋，執法人員必須嚴厲執法，無牌經營就要取締，干犯刑法就要拉人，否則重慶森林只會繼續弊傢伙，姑息養奸少不免會縱容出多幾個淫辱民女嘅變態色魔。
警方固然有必要加強滅罪，另外不妨加設外國語言麗音教育，譬如用英文將以下嘅警告字眼好好翻譯：變態色魔聽住，一旦罪成入獄，盜亦有道嘅獄中囚友唔會放過人渣敗類(口架)！