去年九月立法會選舉首次有五席超級區議會議席，原本劉江華同李慧琼（Starry）代表民建聯參選望爭取連奪兩席，點知最後劉江華「甩轆」，只有Starry勝出，衰咗一席變相係慘勝而回。民記痛定思痛惟有諗計補鑊同執漏，最近就搵咗Starry接掌黨內支部主席會議，究竟能否轉危為機都係未知之數。
該黨一向有個支部主席會議由秘書長負責主持，定期同各支部開會「收風」，但多數限於民生議題，隨住超級議席呢個新生事物出現，但又未能連取兩席超級議席目標，該黨於是變陣，決定「升呢」搵副主席Starry操刀執漏，負責打通十八區經脈，同支部建立更緊密合作關係。
該黨中人形容，呢個安排其實係理所當然，亦有戰略意義，因為依家由Starry直接接掌支部主席會議，一來地區問題可以下情上達，二來佢本人亦可以緊貼區情「收風」，呢個絕對係雙贏局面。不過話說回來，上次打滾過廿載嘅劉江華出戰超級議席都慘遭滑鐵盧，Starry又要執漏又要擴大地區工作層次，認真要打醒十二分精神，否則只會重蹈覆轍，再衰一鑊。