最近有消息傳出，澳門中聯辦高層好快會大換班，包括主任及三名副主任會相繼離任，而另一位副主任李剛就會升正做中聯辦主任，呢個舉動令到唔少澳門政界中人都相當關注。至於離任嘅四名澳門中聯辦高層，包括到達退休年齡嘅主任白志健，佢將於十一月退任，另外三名副主任包括徐澤、高燕及李本鈞，亦都將於月內離任。據聞徐澤會調回國務院港澳辦，擔任之前做過嘅副主任職務。
澳門政界流傳兩個版本，有人認為徐澤專責澳門選舉協調，過去幾年都同各黨派打晒招呼，今屆立法會選舉異常緊張，澳門民主派仲有機會搶奪第四席，令建制派出現危機，所以無理由喺大戰前夕易將，估計徐澤急急調返北京，背後一定另有玄機。不過，亦有分析指，澳門立法會換屆選舉係澳門當地事務，中央不應直接介入。
至於另一個講法，就係話港澳辦高層發生人才荒，由於原港澳辦副主任張曉明已調任香港中聯辦主任，另一位副主任華建亦到達退休年齡，所以北京立即調任熟悉港澳情況嘅官員回京助陣。
雖然目前未知會由邊三個人接替澳門中聯辦副主任職位，但可以肯定嘅係澳門中聯辦主任一職，將會由李剛接棒。