政情：蔡志明父子好事成雙
「玩具大王」蔡志明嘅囝囝蔡加讚（Karson）及女友汪圓圓即將拉埋天窗，婚禮籌備得如火如荼之際，準新郎Karson又咁啱抽中下一季曾經出賽自購馬名額，即將首次躋身馬主行列。多年冇養馬嘅蔡志明，今次亦喺下年度自購新馬抽籤中選，蔡家真係喜事連連。
蔡加讚好運 抽兩次就中
Karson好開心話，今次係佢第二次抽籤購馬匹，估唔到咁幸運就得咗，直認係喜上加喜。佢話自己間中都有入馬場捧朋友場，唔係成日貼住跑馬資訊，但嚟緊就會多啲入場，當係娛樂消遣。佢聽聞爸爸亦都中籤，笑稱要打電話去恭喜爸爸喎！
講到婚禮籌備進展，Karson話主要交畀女友籌辦，進展十分順利，依家開始揀定婚紗及禮服，並着手安排婚宴嘅流程及細節，包括賓客名單，呢部分少不了要問父母意見喇！好彩有咁貼心嘅女友幫手，Karson先可以放心拚搏工作，尋晚仲起程去瑞士洽談鐘錶生意添！今次首次做馬主嘅仲有仁濟醫院總理黃美斯，仁濟之友團體亦被抽中為曾經出賽自購馬候補名單。